Грамоты о новгородо-псковских отношениях с Прибалтикой в XV в.

№ 1. 1418-1419 гг. Грамота Пскова Колывани

Ото князя Федора Олександровича и от посадника псковского Микоуле Павловича от посадника псковского Федоса Фефиловича и ото всихъ посадниковъ псковскихъ, и ото всихъ сочкихъ, и ото всего Пскова к соуседомъ нашимъ добрымъ, к посадникомъ къ колываньскимъ и к ратманомъ. Боуди вамъ сведомо, что есте писали к намъ свою грамотоу о томъ, что оу васъ мертве нашь братъ псковитинъ, а что ся осталося его рухляди, и вы того досмотривши и запечатали. А криво не хочете деяти, а деете право, какъ и всегды добрии люди делають. А писали есте, кто приедеть с тою с вашею грамотою, да и от насъ, от посадниковъ ото псковскихъ, с нашею грамотою, и мы к вамъ писали свою грамотоу к посадникомъ къ колываньскимъ и к ратманомъ къ своимъ соуседомъ, кто вамъ привезеть сию нашю грамотоу и вашю к вамъ, и вы тымъ людемъ даите то моксотинье никоново, что оу вас оумерлъ. А имите вероу сеи нашеи грамоте и печати, зандоже тыи люди, кто к вамъ поехали сь сею с нашею грамотою, томоу Никоноу племеньники. И вы имъ даите чисто по сеи грамоте по нашеи. А тымъ людемъ имяна Левоне да Кононе. А пришла грамота от вашего брата от васъ ис Колывана от Ивана, оу кого мертве нашь братъ Николе. И вы его сиротьство отдаите чисто по правде и по целованью. А останитеся здорови.

№ 2. Ок. 1411. “Челобитье” Ивана Кочерина Колывани

Челобитье от Ивана от Кочерина к посадникамъ колываньскимъ и к ратманомъ и ко всимъ добрымъ людемъ честнымъ, оумнымъ. Вамъ то сведомо ль, что пришла грамота изъ Юрьева къ Немцомъ и ко мне о Кривощоке и о моемъ орудьи. А въ грамоте стоить такъ: имися, Иване, и даи руку за Павла за Трубицина и за Олферья Верятина, за мертвыхъ и за ихъ детеи, кои ся родили и кои ся не родиле, и за ихъ родъ. А оу мене одино слово, какъ язъ молвилъ вамъ свое и где на ратуше положилъ есмь в бозе и въ хрестномъ целованьи и въ васъ добрыхъ людехъ. А въ своемъ слове такъ и стою, имаюся за свои родъ и за свое племя, и за свою братью и руку даю. И вы, господо, всего того посмотрите. А язъ вамъ челомъ бью. А о церкви святого Николе попечальтеся. А новгородци вамъ кланяются. А живите сдорово.

№ 3. Начало XV в. Грамота Риги, Юрьева и Колывани Великому Новгороду

Мы, города Рига и Юрьевъ и Колывань, добро здоровье святому архиепископу новгородскому и посадникомъ и тысячкымъ и старостамъ купечкымъ и всему Великому Новугороду. Буди вамъ сведомо, какъ намъ Иванъ Дуркуи явилъ о тои грамоте, какъ вамъ было охотно. Какъ въ хрестнемъ целованьи стоитъ, и о томъ мы вамъ молимся. А купцомъ свои товаръ отдаите, которое оу нихъ поиманъ оу васъ в Новегороде. Коли нашь товаръ отдадите, ино вашь товаръ потому ж слободенъ по нашимъ городомъ. А купчемъ даите путь чистъ по хрестному целованью. А о томъ нам охотне, чтобы есте дали нашему послу доброи ответъ за вашею грамотою и за вашею печати. А та грамота писана до Спасова дни за две недели в Перневе до Спасова дни, занеже ту имъ былъ съездъ на семъ поморьи. А ся грамота за нашею печатью юрьевьскои. А останьтеся добры и здорови оу святои Софьи.



Новые грамоты о новгородо-псковских отношениях с Прибалтикой в XV в. // Исторический архив, № 1. 1956