Введение к рассказу о Псковском взятии под 1510 г.

Интересное сообщение нашёл в псковских летописях:

Введение к рассказу о Псковском взятии под 1510 (7018) г. по Бальзеровскому и Горюшкинскому спискам.*

Взятье [Пско]вское. Живущим псковичамъ въ сво[еи] [во]ли и князя державнаго владущаго ими не иму[щимъ], но избираху себѣ князя, просящее от инѣх [ст]ран, от великих государствъ, ово от Москвы ово [от] Литовския земли; и держаху его приведшее к себѣ яко наемника, я не яко князя, по закону своему. Таков же бяше обычаи у них: аще что скорбно увидят от него, извѣт ему сотворше, и отсылахут его во отечество свое ему во страну ему, откуду взят бысть и приведен к ним. И бѣ у них взят с Москвы у великогокнязя Василья Ивановича князь Оболенскои Репня; и тот князь живяше у них грозно и свирѣпо, по наказу государя своего великого [князя по московскому обычаю, а не по их чудскому закону; и взимаше у них мзды] велики, и пра[вых] виноватых творяше и виноватых правы[х], и всяческих оскорбляше их, и отроком своим вол[ю вели]ку подастъ, да и они тако же творят, яко же и г[осподин] их злая творяше. Псковстии же мужие не [стеръ]пѣвше надолзѣ бываемаго от него великаго з[ла], скоро избравшее и послаша к Москвѣ пос[лы] [своя] от всего Пскова к великому князю Василью Ив[ановичю], жалящися на служащаго ему князя сво[его и в того] мѣсто иного князя просящее себѣ лутчша тог[о] [обыча]ем, дѣлы и праведнѣиша судом. Князь же вели[кии] отпусти их в землю свою, во град Псков, глаголав имъ [си]це: аз приду самъ в Великии Новгород, и та[мо] пришед и пошлю по князя вашего и желѣзы оковона по руцѣ и по ноз и по выи велю и пред ся привести с великим бесчестием и срамом, яко злодѣя, и сужду вас с ним и на смерть предам его вам яко разбоиника, да что хощете то творите над нимъ, яко вамъ есть любо. Се же глаголаше им, лукавствуя ими и играя яко безумными. Послы же псковстии поидоша радостни с Москвы, яко велико богатство вземше, и пришедшее к себѣ во град Псковъ, и вся реченная им великимъ княземъ сказаша на речи всѣмъ псковичам. [Псковичи жъ слышавше] от послов своих ради быша [зело вси велми и] ждаху пришествия вел[икого князя в Новъго]род, готовящееся ити к нему, хотяще по[глотити] князя своего.

*Дефектные места Бальзеровского списка дополнены по Горюшковскому списку; они взяты в квадратные скобки.

Псковские летописи / под ред. Насонова А. Н. / в. 2, М., 1955, с. 300, 301

Любопытно то, что Псков считал и Литву и Москву в XVI в. равнозначными иностранными государствами, а псковичи не считали себя и московитов одного роду-племени.